”භික්ෂුවගේ චරිතය රඟපෑම ගැන මට දැන් ලැජ්ජයි” – ඩබ්ලිව්. ජයසිරි

0
319

‘ගාමණි’ චිත්‍රපටයේ භික්ෂූන් වහන්සේගේ චරිතය රඟපෑමට සිදුවීම පිළිබඳව තමන් ලැජ්ජාවන බව ප්‍රවීණ රංගන ශිල්පී ඩබ්ලිව්. ජයසිරි ප්‍රකාශ කර තිබේ.

තමන් නියෝජනය කරන මතවාදයට එරෙහිව අන්තවාදී භික්ෂූන් වහන්සේ නමකගේ චරිතය රඟපෑමට සිදුවූයේ මුදල් නිසා බව ඔහු එහි දක්වා තිබේ.

ශ්‍රී ලංකා රුපියල් මිලියන 100කට අධික ආදායමක් ඉපයු ගාමිණි චිත්‍රපටය යුද සමයේ දී මායිම් ගම්මාන තුළ ජීවත් වූ සිංහල ජනතාවගේ දුක්ඛිත ජීවන තත්ත්වය විඳහා දැක්වෙන අග්‍රගන්‍ය කලා නිර්මාණයක් ලෙස සැලකේ.

ඩබ්ලිව් ජයසිරියන් ඒ සම්බන්ධයෙන් පළ කළ සම්පූර්ණ අදහස පහතින්…..

”වැඩිහිටියෙක් ලෙස, වයස හතලිහක් විතර වෙන කාලෙ මගේ ජීවිතයේ අරමුණ උනේ වෘත්තීය නලුවෙක් හා කාගෙවත් උවමනාවට නොලියන ලේඛකයෙක් වෙන්න. මූලිකම වුනේ සාර්ථක රංගන ශිල්පියෙක් වෙන්න. වෘත්තීය නලුවෙක් කියන්නෙ රඟපෑමෙන් සල්ලි හම්බ කරනව කියන එක නෙවි. කෙටියෙන් කිවුවොත්, සතතාභ්‍යාසයේ තත්පරවෙන නලුවෙක් වීම. මෙතැන දී මුදල් වැදගත් වෙනව. මම මුදල කියල හිතුවෙ ගණන නෙවි…. වටිනාකම. එහෙත් ලංකාව වගේ ආර්ථික පැත්තෙන් හුඟක් දුප්පත්, මතවාදීව ප්‍රගතිශීලිවීම ඉතාමත් දුර්වල රටක වෘත්තීය නලුවෙක්වීම පුක මහගෙන බඩසුද්ධ වෙන්න කෂාය බොනව වගේ වැඩක්.

අදටත් මාව අගය කරන බොහෝමයක් ප්‍රේක්ෂකයන් ඉතාමත් ඉහළින් වර්ණනා කරන චරිතයක් තමයි “ගාමණී” චිත්‍රපටයට මම රඟපෑව බෞද්ධ භික්ෂුව ගේ චරිතය. එහි සහාය අධ්‍යක්ෂක අසෝක අතාවුදහෙට්ටි මාව එම චිත්‍රපටයට එකතු කර ගන්නට ලොකු උත්සාහයක් ගත්ත. මම කියන්න යන දෙයට ඔහුගේ අබැටක සම්බන්ධයක් නැහැ.

”ගාමණී” පිටපත ලියල අධ්‍යක්ෂණය කළේ නාවුක හමුදාවේ සේවය කල rear admiral සරත් වීරසේකර. එයා මූලික වී සංවිධානය කළ සිවිල් ආරක්ෂක හමුදාවේ උත්පත්ති කතාව තමයි එහි තේමාව. ආණමඩුව මැතිවරණ කොට්ඨාශයේ, කරුවලගස්වැව එතරම් සශ්‍රීක නොවූ පන්සලක චිත්‍රපටය රූපගත කළේ. මේ චිත්‍රපටය අධ්‍යක්ෂණය කළ සරත් වීරසේකර නාවුක හමුදාවේ සේවය කරන කාලෙ ඉඳල ඔහු ඊනියා දේශප්‍රේමියෙක් හා ජාතිවාදියෙක් බව මම දැනගෙන හිටිය. මගේ වටිනාකම මුදලින් ලැබුන හෙයින් මං රඟපාන්න කැමති උනා. තිරනාටකය කියෙව්වෙ නෑ. (කියවලා තිබුනත් ලැබෙන මුදල ගැන හිතල මම ඒ චරිතය රඟපානව) ජාතිවාදී සරත් වීරසේකරට කියන්න ඕන වෙලා තිබුනු ඔක්කොම අලුගුත්තේරු ජාතිවාදී අදහස් භික්ෂුවගෙ දෙබස් ලෙස ලියවිල තිබුන. ඉතිං බුදුබණ විධියට අර්ථකථනය කරමින්, මරා දැම්ම්ත් මම නො අදහන මතවාදය මගේ මුවින් කිවුව. එක තැනක භික්ෂුව කියනව මෙහෙම (මේ වචනම නොවුනත් අදහස මේක) ”මිණීමැරීම පාරාජිකාවක්…. භික්ෂූත්වය……. නැතිවෙනව….ඒත් ආත්මාරක්ෂාව සඳහා එහෙම කරාට කමක් නෑ කියල බුදුන් වහන්සේ දේශනාකරල තියෙනව”. දෙමලුන්ගෙන් තම්බින්ගෙන් බුද්ධාගමයි රටයි බේරා ගන්න වලිකන සිංහල බෞද්ධයින් දොහොත්මුදුන් තබා මේ චිත්‍රපටය බලල රුපියල් ලක්ෂ 1000කට වඩා ආදායම තර කරා.”

”SIDNEY POITIER නම් වූ සුවිශේෂ රංගධරයා තදින්ම මුදල් අවශ්‍ය අවස්ථාවකවත්,නො සිතූ වටිනාකමක් ලැබිලත් තම මතවාදයට එරෙහි චරිතයක් රඟපෑම ප්‍රතික්ෂේප කලා. එවැනි උතුම් තීරණ ගන්න බැරි රටක නලුවෙක් උනු මට POITIER කෙනෙක් වෙන්න හීණයක් දකින්නටවත් බැහැ. මට මෙහෙම ලියන්න හිතුනෙ තවම මම නො නැරඹූ හඳගම, විමුක්ති , ප්‍රසන්න හැදූ “තුන්දෙනෙක්” ගැන ලියූ අදහස් කියවීමෙන් හටගත් ආත්ම ලැජ්ජාව නිසා.”

LEAVE A REPLY

Please enter your comment!
Please enter your name here